سفارش تبلیغ
صبا ویژن
دانشجویی، بر هر مسلمانی واجب است . هان ! خداوند، جویندگان دانش را دوست دارد . [رسول خدا صلی الله علیه و آله]
لوگوی وبلاگ
 

دسته بندی موضوعی یادداشتها
 
شعر ، دنیز ، آذربایجان ، ارومیه ، علیار ، قلیزاده ، مصطفی ، غربی ، امام ، ترکی ، علی ، ترکی ، شاعر ، دنیزنیوز ، حوزه ، هنری ، حسین ، اسلامی ، حمیدی ، غزل ، محمد ، حاج ، ایران ، فارسی ، باکو ، قرآن ، کتاب ، نشریه ، اسلام ، تبریز ، طنز ، کتاب ، عاشیق ، شهریار ، اکبر ، انقلاب ، مصطفی قلیزاده علیار ، نخجوان ، شهید ، سایت ، سید ، باکو ، اهل بیت ، ابراهیم ، سفر ، دریاچه ، فخری ، ادبیات ، تصویر ، خمینی ، دفاع ، رضا ، پیغمبر ، جمعه ، اسرائیل ، مقدس ، نامه ، مهدی ، حوزه هنری ، حمید ، صادق ، فاطمه ، پیامبر ، بهرام ، اکبر ، اهر ، فاطمه زهرا ، نارداران ، مقاله ، عاشورا ، عکس ، زهرا ، ترکیه ، کربلا ، همایش ، واقف ، ترکیه ، بسیج ، بیت ، جمهوری ، اهل ، انتظار ، امام علی ، ادبی ، در ، عراق ، صابر ، شهر ، شامی ، خامنه ای ، خدا ، دوستی ، زن ، سعید ، اسدی ، آیت الله ، امام حسین ، هنرمندان ، ورزقان ، هفته ، مردم ، موسیقی ، نقد ، قم ، محمود ، کانون ، امام خمینی ، جنبش ، جشنواره ، خاطرات ، حافظ ، حجاب ، حسنی ، حسن ، تاریخ ، سال ، رستمی ، شیخ ، عکس ، فرهنگی ، فرهنگ ، فضولی ، عید ، عشق ، سیاسی ، رمضان ، زبان ، سلیمانپور ، شاعران ، سوریه ، ترجمه ، تهران ، به ، حاج علی اکرام ، ایرانی ، آمریکا ، وبلاگ ، واحدی ، نویسنده ، مدح ، محفل ، مجلس ، مجتبی ، میرزا ، مرثیه ، مصر ، آمریکا ، آراز ، احمد ، استاندار ، اکرام ، حیدر ، تبریزی ، پیامبر اسلام ، سلبی ناز ، روز ، زندگی ، زینب ، رضوانی ، دو ، داستان ، صراف ، عظیم ، علی یف ، علیزاده ، علمیه ، علمدار ، فتح الهی ، فرانسه ، فلسطین ، فیلم ، شاهرخ ، شجاع ، دو هفته نامه ، دیدار ، رسول ، رجبی ، زلزله ، پیام ، بهمن ، حزب ، جواد ، ادب ، اردوغان ، آذربایجان غربی ، آثار ، مطبوعات ، مشهد ، مهدی موعود ، محمداف ، کانون ، نویسندگان ، هفته نامه ، هنر ، وطن ، ولی ، یاد ، هادی ، نوروزی ، نماز ، قیام ، کرکوک ، محسن ، مثنوی ، ماه ، مایل ، ملی ، آذری ، آزادی ، ارشاد ، از ، اسماعیل زاده ، انگلیس ، اورمیه ، اکرام ، جاوید ، حدیث ، حسینی ، حضرت ، بهرامپور ، بعثت ، روزنامه ، رهبری ، سعدی ، رباعی ، رزم آرای ، دینی ، دانشگاه ، شب ، غدیر ، غفاری ، علامه ، عرب ، عرفان ، فارس ، فرزند ، صمداف ، صادقپور ، صدر ، طلعت ، طلاب ، خوی ، دوزال ، رهبر ، بزرگ ، بیداری ، تبلیغات ، حمایت ، حماسه ، حاجی زاده ، جعفری ، توهین ، امین ، انتخابات ، انجمن ، امام زمان ، الله ، استاد ، اخلاق ، آیت الله خامنه ای ، آران ، آغدام ، آقازاده ، منظومه ، مسلمان ، مراغه ای ، مسئولان ، موعود ، موسی ، ماهر ، محمدی ، هریس ، یادداشتهای ، وفات ، یحیی ، یک ، کردستان ، کربلا ، نوروز ، نمایندگان ، وحید ، مایل اوغلو ، گرمان ، مولانا ، میلاد ، نباتی ، مسجد ، مرگ ، مرسی ، مسئول ، معلم ، آغری ، آذربایجانی ، اسلامگرایان ، اسماعیل ، ارمنستان ، ارمنی ، ارزشها ، اشغال ، باکو 10 ،

آمار و اطلاعات

بازدید امروز :212
بازدید دیروز :64
کل بازدید :2866054
تعداد کل یاداشته ها : 881
102/12/29
9:29 ص
مشخصات مدیروبلاگ
 
قلیزاده علیار[263]

خبر مایه
پیوند دوستان
 
سرچشمه ادب و عرفان : وب ویژه تفسیر ادبی عرفانی قرآن مجید شقایقهای کالپوش بچه مرشد! سکوت ابدی هم نفس ►▌ استان قدس ▌ ◄ نغمه ی عاشقی جریان شناسی سیاسی - محمد علی لیالی سرچشمه همه فضـایـل مهــدی(ع) است ساده دل ماییم ونوای بینوایی.....بسم الله اگرحریف مایی ....افسون زمانه طراوت باران تنهایی......!!!!!! جـــیرفـــت زیـبا سارا احمدی بیصدا ترازسکوت... .: شهر عشق :. پیامنمای جامع شهر صبح ماتاآخرایستاده ایم سایت روستای چشام (Chesham.ir) وبلاگ گروهیِ تَیسیر منطقه آزاد محمدمبین احسانی نیا رازهای موفقیت زندگی مرام و معرفت یامهدی Dark Future امام خمینی(ره)وجوان امروز عشق ارواحنا فداک یا زینب سیاه مشق های میم.صاد مهاجر مردود دهکده کوچک ما گروه اینترنتی جرقه داتکو بسیج دانشجویی دانشکده علوم و فنون قرآن تهران هفته نامه جوانان خسروشهر آتیه سازان اهواز بیخیال همه حتی زندگیم عمو همه چی دان پـنـجـره صل الله علی الباکین علی الحسین تینا شهید آوینی Chamran University Accounting Association پدر خاک فقط خدا از یک انسان ع ش ق:علاقه شدید قلبی تبریک می گوییم شما به ساحل رسیدید!!!!! گاهنامه زیست جوک و خنده دهاتی دکتر علی حاجی ستوده قلب خـــــــــــــــــــــــــــاکی کشکول sindrela شیدائی تنها عاشقانه سیب آریایی نیروی هوایی دلتا ( آشنایی با جنگنده های روز دنیا ) به یاد تو آخوند مالخر و تمام طرفدارانش در سیستم حکومتی فروشگاه من قاضی مالخر یا قاضی طمع کار کدامیک ؟؟؟؟ پایگاه خبری،قرآنی، فرهنگی آذربایجان غربی عاشقانه زنگ تفریح


بیرینیجی اربعین حاقدا

اکبر حمیدی علیار

 کربلا اولاییندان سونرا، اهل بیتین بیرینجی دؤنه اولاراق، هاچان کربلایا قاییدیشلاری باره­ده و 61-نجی قمری ایل صفر آیی­نین 20 سینده حضرت امام حسینین (ع) و باشقا شهیدلرین مزارینی زیارت ائدیب- ائتمه­ملرینه گؤره تاریخچیلر و اؤزللیکله ده مقتل یازانلار آراسیندا، عصرلر بویو چوخلو مباحثه­لر و دارتیشمالار گئدیب. چوخلاری­نین فکرینجه 40 گونده کربلادان دمشقه گئدیب قاییتماق، او دا بیر بؤلوک اسیر قادینلار و اوشاقلارلا، جغرافیایی یوللاری و مسافه­نی نظره آلاراق، اولاسی بیر ایش دئییل؛ آنجاق بیر سیرا تاریخی خبرلرین، بوتون قایناقلاردا عینی اولدوغونو نظره آلدیقدا، اسیرلرین محض همن صفر آیی­نین 20 سینده کربلادا حاضر اولماقلارینی نتیجه چیخارماق چوخ دا چتین اولماییر. مرحوم آیت­اله عندلیب همدانی (1378-1278 ش.) اؤز دیه­رلی اثری "ثارالله" کتابیندا مختلف تاریخی کتابلار، قایناقلار و خبرلری توتوشدوروب، بیلیمسل، علمی و عقلی بحثلرله اهل بیتین بیرینجی اربعینده کربلایا قاییتمالارینی، فاکتلارلا ثبوت ائدیر. بو آراشدیرمانین قیسا سونوجو بئله­دیر:
اسیرلر عاشورادان ایکی گون سونرا کوفه­یه چاتیرلار، ابن زیاد، یزیده مکتوب گؤنده­ریر و نه ائده­جه­یینی سوروشور، او زامان بو سایاق مکتوبلاری، «برید» آدلانان اؤزل قاصدلر آپارارمیشلار، بوتون تاریخ و جغرافیا قایناقلاریندا بریدین کوفه­دن دمشقه گئتمه­سینی تخمیناً 3-4 گون قید ائدیبلر، بس 7-8 گون ایچینده یزیددن - اسیرلری شاما یا همان دمشقه گؤندر- جوابی گلیر. ابن زیاد اؤز آغاسی یزیدی سئویندیرسین دئیه، اسیرلری ایتی یول گئدن ماللار و مرکبلرله (بعضی قایناقلاردا همان بریدلرین مرکبلری ایله) یول­اوزونو دایاندیرمادان شاما دوغرو گؤتورور و صفر آیی­نین بیرینده، یعنی تخمیناً 12 گون عرضینده دمشقه چاتدیریر. یزیدین بویروغو ایلا اسیرلر خرابه آدلی بیر یئرده ساخلانیرلار، آنجاق حضرت امام سجاد (ع) و خانیم زینبین فعالیتی نتیجه سینده، ایکی گونون ایچینده یزید، عموم مسلمانلار ایچینده حؤرمتینی ایتیرمه­یی دویارکن، گؤردویو ایشیندن (اوزده ده اولموش­سا) کور-­پئشمان اولور، تمامی ایله اؤزونو باشقا جور گؤستریر، اسیرلره سایقی­ایلا یاناشماغی و بوتون گوناهلاری ابن زیادین بوینونا آتماغی اؤزونه مقصد گؤتورور، یعنی اهل بیتین شام خرابه­سینده حبس اولونماقلاری آرتیق صفرین 3-نده بیتیر.
باشقا طرفدن یئنه­ ده بوتون قایناقلارین وئردیگی معلوماتا گؤره اسیرلره تعزیه و یاس تؤره­نلری قورماغا اجازه وئریلیر و 3 گون دمشقده عزا مراسمی برپا ائدیلیر و یزید، اسیرلری چوخ حؤرمتله اؤز یوردلاری مدینه­یه یولا سالماغا قرار وئریر. نهایت نعمان بن بشیرین باشچیلیغی ایلا بیر قوروپ قوروجو، اهل بیتی صفرین 8-نده دمشقدن مدینه­یه ساری گتیریرلر. ایندی آرتیق اهل بیت آزاد و سربست­دیرلر، ایسته­دیکلری ایشلری نعماندان طلب ائده بیلردیلر و اونلار اؤنجه کربلایا گئدیب، سونرا اورادان مدینه­یه گئتمک­لرینی ایسته­دیلر، عزیزلری­نین مزارلارینی زیارت ائتمک ایسته­یی و ان اؤنملیسی کسیک باشلاری تئزراق کربلایا چاتدیریب جسدلره قوووشدورماغین گره­ک­لیگی بیر داها اونلارین یئیین و دورمادان یول گئتمک­لرینه اساس وئردی، اونلار یئنه ده عادی واختلار 20 گونه گئدیلن 20 منزیل­لیک یولو، 12 گونده گئدیب کربلایا چاتدیلار.

منبع: دنیز نشریه سی، نؤمره 60- مورخ: 10 آذر 1393

 

 

 


  

 

خاری بولبول

اکبر حمیدی علیار

«خاری بولبول» طبیعتده

"خاری بولبول" شوشانین میللی سیموولودور. دونیانین هئچ بیر یئرینده راست گلینمه‌ین خاری بولبول تانری­نین آذربایجانا گؤندردیگی ان بؤیوک معجزه­دیر. طبیعتین معجزه­سی­دیر. خاری بولبول سانکی گولون اوزرینه قونموش بولبولو خاطیرلادیر. بولبولون باغری­نین آلتینداکی گول آل-قیرمیزی رنگه بویانیب. بو چیچکلر اساساً آلپ چمنلیگینده اولور. آران یئرده تئز سولسا دا داغلاردا اوزون مدّت قالیر.

«خاری بولبول» تاریخ و ادبیاتدا

وطن باغی آل-الوان­دیر.

یوخ ایچینده "خاری بولبول" ،

عؤمور سورمه‌لی دؤوران­دیر،

سسین گلسین باری بولبول.

خاری بولبول حاقیندا بیر چوخ روایتلر موجوددور. بئله دئییرلر کی، قاراباغ خانی­ ابراهیم­خانین قیزی «آغابه­ییم آغا»نی تهراندا یاشایان، قجر شاهلاریندان اولان فتحعلی شاها وئریرلر. او واخت خانلیقلار آراسیندا علاقه­لر یاراتماق اوچون "نیکاح دیپلوماتییاسی" دئییلن قیز آل-وئریندن استفاده ائدیردیلر. آغابه­ییم آغا دا بئله بیر ازدواجین قوربانی اولموشدو. خان قیزی غوصه­لنمه‌سین دئیه، شاهزاده سارایین یاخینلیغیندا اونون اوچون بیر وطن باغی سالدیرمیش، قاراباغ تورپاغی­نین یئتیردیگی بوتون آغاجلاردان، گول-چیچکلردن گتیریب همین باغدا اکدیرمیشدی. آما نه قدر ائدیبلرسه ده "خاری بولبول" گولونو عمله گتیره بیلمه‌ییبلر. بو خلق ماهنیسی دا ائله او واختدان یارانیب، همین اووقاتا کؤکله‌نیب. چوخ گومان کی بو ماهنی دا «عزیزینم قاراباغ/ شکی، شیروان،قاراباغ/ قوربت جنت اولسا دا/ یاددان چیخماز قاراباغ» بایاتیسی­نین شاعری، آدینی یوخاریدا چکدیگیمیز آغابه­ییم آغادان دیر.[1]

"خاری بولبول" طبیعته وئردیگی گؤزللیگی ایله یاناشی معالیجه اهمیتلی بیتگی­دیر. "خاری بولبول"دن خلق طبابتینده مختلیف خسته‌لیکلرین معالیجه‌سینده ده گئنیش استیفاده ائدیلیر.

"خاری بولبول" خلقین یادداشیندا (افسانه­لرده)

روایته گؤره بیر گون بولبول اؤز سئوگیلیسی گولون گؤروشونه گئتمک ایسته‌دیگی واخت برک کولک اسیر. کوله­یین مقصدی گولو بولبولون گؤزلری قارشیسیندا آلچالتماق ایمیش.

کولک اؤز گوجونه، قوووه‌سینه حددیندن آرتیق اینانیرمیش. او اسنده، حرکته گلنده، عالمی توزاناغا بوروینده بوتون جانلیلار اونون قارشیسیندا اَییلرمیش. مقاویمت گؤسترمک ایسته‌ینلری نئچه یئره شاخبوداق ائله‌ییب یئرله-یکسان ائدرمیش.

بیر گون کولک وار قوووه‌سیله اسیرمیش. نهنگ چینارلار، اوجا سرولر، سالخیم سؤیودلر اونون قارشیسیندا دؤنه-دؤنه اَییلیردیلر. یالنیز ظریف، گؤزل، عطیرلی گول کوله­یین آزغینلیغینا، یئکه­خانالیغینا تابع اولموردو. بونو گؤرن کولک حئیرته گلدی:

_ آی ظریف، آی ضعیف گول، سن هانسی جسارتله منه باش اَیمیرسن؟ سن بو گوجو هاردان آلیرسان؟

گول ایناملا جاواب وئردی:

_ محبتدن! محبتین گوجو یئنیلمز اولور. سئوه­ن ووقارلی اولور، او هئچ کسه باش اَیمک ایسته­میر. من بولبولو سئویرم. اونون صاف محبتی منی باش اَیمه‌یه قویماز.

-باخاریق! سن محبتینی سینا، من ده گوجومو…

کولک بو سؤزلری دئییب کوکره‌دی. ائله بو واخت بولبول سئوگیلیسی گولون گؤروشونه گئدیردی. کوله­یین غضبی یئره، گؤیه سیغمیردی. ظریف اوتلاردان توتموش فیل گؤوده‌لی آغاجلارا قده­ر اونا باش اَییردی. آرتیق گول سون قوووه‌سینی توپلاییردی. اونون مقاویمتی توکنمه‌یه باشلاییردی. چونکی او، تک قالمیشدی. اگر بولبول یانیندا اولسایدی…

گول بیر یارپاق اَییلدی. کولک غلبه‌سیندن سئوینه‌رک داها برکدن اوغولدادی. بیر آز دا کئچه‌جک، کولک گولو اؤز گوجو ایله ایکی­قات ائده‌جکدی. بولبول اؤزونو واختیندا گولون هارایینا چاتدیریر. او، سینه‌سینی یاواش-یاواش اَییلن گولون کؤکسونه سؤیکه‌ییر. کولک داها دا حددتله‌نیر. بولبول گولون اَییلن قامتینی دوزلدیر. آنجاق گولون خاری (یعنی تیکانی) اونون سینه‌سینه سانجیلیر. بولبول محو اولور، گولو بیر آددیم بئله اَییلمه‌یه قویمور. ائله همین واختدان اؤزونو محبت اوغروندا فدا ائدن بولبولون آدی خاری بولبول قالیر. گول خاری بولبول گؤرکمینده گوللر آچیر. همین خاری بولبول گولو هئچ بیر قیزیل­گول کولونا و گولونه بنزه­میر.


 [1]  -آغاباجی تخلصو ایله آذربایجان تورکجه­سی و فارس دیللرینده شعرلر یازان آغابه­ییم آغا، قاراباغ خانی ابراهیم خلیل­خانین قیزی و خورشیدبانو ناتوانین بیبی­سی­دیر. تخمیناً 1781-1780-نجی ایللرده پناه­آباددا (ایندیکی شوشادا) آنادان اولموشدور. 1801-نجی ایلده ایران حکمداری فتحعلی شاها اره وئریلمیش و عمرونون سونونا کیمی وطن حسرتی، قوربت عذابی چکدیگی تهراندا یاشامیش، 1832-جی ایلده اورادا وفات ائتمیش و دارالایمان آدلاندیریلان قوم شهرینده دفن اولونموشدور.

 منبع: «دنیز» هفته نامه سی، نؤمره 59 - نشر تاریخی 29 آبان 1393 - اورمیه شهری

 


  

بیر قلبین سیرری

«تانری سئوگیسی» کتابینا بیر باخیش

کؤنول اسماعیل­زاده / کؤچورن: اکبر حمیدی علیار

اشاره: حؤرمتلی یازیچی، پوبلیسیست و شاعر صابر شاهتاختی جنابلاری­نین تانری سئوگیسی آدلی شعر توپلوسونو کئچمیشده دنیز سایتی و قزئتینده عزیز اوخوجولارا تانیتدیرمیشدیق، بو کتاب تزه‌لیکده حؤرمتلی اسماییل فتحی خسروشاهی جنابلاری­نین زحمتی ایله اسکی الیفبادا تک­درخت نشریاتی طرفیندن تهراندا نشر ائدیلیب­دیر، ایندی ایسه شرق­شوناس عالیم کؤنول اسماعیل­زاده­نین همین کتابا یازدیغی «بیر قلبین سیرری» آدلی رأیینی حؤمتلی اوخوجولارا تقدیم ائدیریک:

خالقین میللی دیه­رلرینه صاحیب چیخان، آتالاریمیزدان قالان عرف و عادتلریمیزی گؤز ببه­یی کیمی قورویان، ائلی­نین هر داشینی، جیغیرینی، سرین بولاغی­نین شیریلتیسینی، یاشیل مئشه‌سی­نین عطرینی، اوباسی­نین تویونو-بوساتینی، ننه‌لرین یاپدیغی چؤره­یین دادینی قان یادداشینا یازان ناخچیوان ائلی­نین هر بیر قوجاسی و جاوانی، عینی زاماندا بو زنگینلیکلری نسیلدن نسیله اؤتورمکله تاریخ قارشیسیندا بیر عالی میسسییانی یئرینه یئتیریر.

زنگه­زور و باشقا اوبالاریمیزین یادلارا وئریلمه‌سی ان بؤیوک آجییی محض ناخچیوانا یاشاتدی. اون­ایللیک­لرله آنا وطندن آیری قالماق مجبوریتی، عصرلرله سنه دوشمن کسیلمیش یادلارین بابالاردان میراث قالان تورپاقلاردا مسکن سالماسی - بو اوره­ک داغلایان حقیقته صبر ائتمک شوبهه‌سیز کی، چوخ چتین اولوب.

محض بو سببدن­دیر کی، ناخچیوان اهلی­نین اؤزونو، تاریخینی، عادت-عنعنه­لرینی، دیلینی و دینینی قوروماق و ان خیردا یاد عونصوردن بئله مدافعه ائتمک باجاریغی اینانیلماز درجه‌ده گوجلودور.

بو تورپاقلاردا بؤیویوب بویا-باشا چاتمیش صابر شاهتاختی (حاجی­یئو) ناخچیوان کیمی صفالی وطنینده یاشارکن بئله بؤیوک وطن حسرتی ایله یاشایان ضیالیلاریمیزدان­دیر. اؤزونو درک ائدن و وطن سئوگیسی ایله دولغونلاشمیش هر بیر کس شاعرین "اؤلکه‌میز، ائلیمیز، بیزیم کندیمیز" آدلی پوئماسیندا دئدیگی کیمی:

 ناخچیوان، قاراباغ، شیروان، بورچالی،

زنگه­زور، قازاخ­دیر ائلین ماحالی،

تبریزه قارداش­دیر باکی و گنجه،

اولانلار عبرت­دیر قوجایا، گنجه.

سینه­مه اود چکیب همدان، دربند،

تاریخ صحیفه­لنیر بوردا بندبه­بند -

 اونون شیمالیندان جنوبونا، شرقیندن غربینه‌د­ک هر بیر قاریشینی عزیز توتور.

هئچ شوبهه‌سیز کی، ص.شاهتاختی­نین وطن سئوگیسی ایلک اولاراق اؤز اوباسینا، کندینه، آتا اوجاغینا اولان باغلیلیغیندان و سوی کؤکونه اولان توکنمز محبتدن، جوشغون رغبتیندن­دیر. شاعرین دده-بابا یوردونا اولان صداقتیندن بهره­لنن وطن عشقینی بو مصراعلاریندا آچیق-آیدین حیس ائتمک اولار:

 

...اثری حصر ائتدیم اولو روحلارا،

بورجومو قایتاریم دوغما تورپاغا...

اؤده­مک چتین­دیر ائلین بورجونو،

وطنین زنگین­دیر شرف خورجونو.

 شاعرین 1991-جی ایلده شوشادا یازدیغی مصراعلاریندا آنا و وطن آدلاری­نین قوشا چکیلدیگی­نین و بونلارین مؤلف اوچون مقدس معنا داشیدیغی­نین شاهدی اولوروق:

 وطنله آنانین معناسی قوشا،..

...زیروه‌سیز همیشه گؤزومده قوشا.

 قیسا، لاکین مضمونجا اهمیتلی "داغلارا بزه­ک شوشا" (شوشا، 1991)، "خان یایلاغی" (شکی،2000) شعرلری انسانین یاشیندان آسیلی اولمایاراق دوغما ائللره حیرانلیغینی تصویر ائدن اوره‌یه یاتان لیریکا نمونه‌لریندن­دیر. آنالاریمیزین لایلاسی­نین، بایاتیسی­نین ساده دیلینده یازیلمیش بو شعرلر ائل-اوباسینا صداقتله باغلی اولان هر بیر کؤنوله خطاب ائدیر.

کتابدا شاعرین وطن­پرور شعرلری ایله یاناشی دینی، بعضاً ده فلسفی فکیرلرین دویولدوغو بیر سیرا شعرلری اوخوجونون دقتینی جلب ائدیر. اثرلری­نین مضمون زنگینلیگی ایله خالقیمیز آراسیندا بؤیوک رغبت قازانمیش زمانیمیزین فیلوسوف-لیریکی و گؤرکملی شاعری رامیز رؤوشن، بؤیوک ادیبلریمیز بختیار وهابزاده، خلیل رضا و دیگر معاصرلریمیز یارادیجیلیقلاری­نین مختلیف دؤورلرینده بو آسپئکتلی ماراقلی شعیرلر یاراتمیشلار. انسانین بو دونیادا یارادیلیشینین سیررینی آراماغا چالیشان، اونون جاهاندا یئرینی، تانری­نین سونسوز رحمتینی تصویر ائدن ص.شاهتاختی البتده کی، بؤیوک شاعیریمیزین داوامچیلاریندان ساییلا بیلر.

 ...تانری­نین چرخینده فیرلانیریق بیز،

تانری سئوگیسییله نورلانیریق بیز،

طالع بیر یئلکن­دیر، دونیا بیر دنیز،

بو سیرری یارادان تانری­یا حیران.

 "گؤیلره قوناق" ،"هئچدن" ،"هر آن او یانی" ،"ربیمه یاخین" ،"عبادت" ،"بو سیرری یارادان تانری­یا حیران" سرلؤوحه‌لی شعرلرده بعضاً تانری قارشیسیندا عؤمرون کئچن گونلری­نین حساباتی، بعضاً اونا سونسوز باغلیلیق و شوکور، بعضاً ده "هئچ نه‌یه احتیاج یاشامایان آللاهین قدرتی..." تصویر اولونور.

"تانری بنده‌سیندن نییه آرالی؟" شعرینده (باکی، 2007) مؤلف حیاتدا قارشیلاشدیغی حاقسیزلیقلدان، ماددی جهتدن زنگین لاکین روحاً جیلیزلاشمیش انسانلارین قلبی­نین غدارلیغیندان گیلئی ائدیر، یارالی خالقی­نین دردینه سانکی تانریدان درمان دیله‌ییر:

 ...گؤز یاشی­نین ناله‌سیندن باتیر سسلر،

حاق تاپدانیر، دین سؤیولور، پول گولدورور،

دوز اَییلیر، دوزلمه‌ییر قامتلر،

بنده تانریسیندان نییه آرالی؟

 

شعرین ماراقلی بیر آسپئکتی آدی­نین "تانری بنده‌سیندن نییه آرالی؟" اولدوغو حالدا ص.شاهتاختی­نین اصلینده انسانلارین حاقدان، دیندن، انصافدان، تانری سئوگیسیندن اوزاق دوشمه‌سینی، "...بنده­نین تانریدان آرالی" قالماسینی اوره­ک آغریسی ایله گؤسترمه‌سی­دیر.

 ...کیمی چؤرک دردین چکنمیر اؤلور،

کیمی ثروت اوچون سارالیب-سولور،

کیمی کورسو اوچون بیناموس اولور،

بنده تانریسیندان نییه آرالی؟

 آغیر طبیعتی، جیدی­لیگی و ایللرین تجروبه‌سیندن گلن تمکینی ص.شاهتاختی­نین شعر دیلینه ده یانسیییب. سانکی مؤلف اؤز آستا سسی ایله اؤز اوخوجوسو ایله صحبت ائدیر، قلبینی اونا آچیر.

ص.شاهتاختی یارادیجیلیغی­نین مهم بیر حصه­سی محبت لیریکاسینا عاییددیر. مختلیف ایللرده یازیلمیش محبت شعرلری کیمی کؤورک و صمیمی کیمی چیلغین و آلوولو نوتلارلا زنگین­دیر.

"قییارام­می؟" ، "اوزاق ائت عشقیمی دوشمن شرریندن" شعرلرینده شاعر یارینا سونسوز دیه­ر وئردیگینی، اونو آیریلیقلاردان، غصه -کدردن، تنهالیقدان قوروماغا چالیشدیغینی گؤستریر.

 

...من سئوگینی یاشامیرام، دویورام،

آخان گؤز یاشلارینا قییارام­می؟

من حیس­لرین، دویغولارین وورغونویام،

اوره­ک چیرپینتینا هئچ قییارام­می؟

شاعرین "گؤزللر گؤزه‌لی" (شانخای، 2004)، "روا بیلمه" (تبریز، 2007)، "سوروش" (باکی، 2007)، "گؤرمه­ییم بسدیر" (باکی، 2007)،"سئوگی مئهمانی" (باکی، 2007) شعرلری مؤلفین صمیمی و تمیز حیس­لرینی اینجه کؤنوللره توخوندوراجاق شیرین بیر دیلله اوخوجویا چاتدیریر.

ص.شاهتاختی­نین "گؤزلر" (باکی،2007)، "گؤزللر گؤزه‌لی" (شانخای، 2004)، "یاراشیق" (تئهران، 2007)شعرلرینده، گنج خانیمین جان آلان باخیشلاری سانکی شاعرین قلبینه ملهم اولور.

 قلم قاشلار گؤزلرینه یاراشیق،

سنی گؤروب یئری­ییرم دولاشیق،

باخیشلارین گؤزوندن ده یاراشیق،

گؤزون رنگی یاراشیغا یاراشیق...

 و یاخود

 عوضسیز یاراشیر گؤزلر صورته،

بئل-بوخون بزکدیر قدده قامته.

قلبده‌کی او سئوگی لاییق قییمته،

غالیبسن ثروته، وارا دؤولته.

 مؤلفین گؤزللیی،اینجه باخیشا، خوش غمزه‌یه حصر اولونموش بو مصراعلارینی اوخویان هر بیر خانیم سانکی او تصویرلرده اؤزونو گؤرور.

"شبنم" شعری ص.شاهتاختی یارادیجیلیغیندا خصوصی یئره مالیک صمیمی دویغولاری، آیریلیق حسرتینی، وصال سئوینجینی هر کلمه‌سینده گؤسترن بیر اثردیر.

 ...آچیلمیر اوره­ییم حسرت غمیندن،

حسرتین آغیردیر قدرت غمیندن.

 

منیم سئوینجیم­سن، هم ده کی، غمیم،

سنسیز بو حیاتدا غم­دیر همدمیم،

بیلمیرم نه دئییم، هارایا گئدیم،

بلکه بو دونیادان تله‌سیک گئدیم.

 

ایللرله قوربت ائللرده چالیشیب وطنینه سؤزو ایله، قلمی ایله خدمت ائدن ص.شاهتاختی اونون یولونو دونیانین ان صاف و تامامیله تمناسیز محبتله گؤزله‌ین اؤولادلارینی، کؤرپه قیزینی "گؤره‌جه­یم"(تهران، 2008) "تانری­نین واری" (2007) آدلی شعرلرینده تصویر ائدیر. اونلاری باغرینا باساجاغی آنی حسرتله گؤزله‌ین آتا بئله یازیر:

 گلیب سنی گؤره‌جه­یم،

ساچلارینی اؤپه‌جه­یم،

اسه‌جه­یم یارپاق کیمی،

جوشاجاغام بولاق کیمی...

 بو یازیمیزدا شعرلرینی آراشدیرماغا چالیشدیغیمیز ص.شاهتاختی عینی زاماندا "اؤلکه‌میز، ائلیمیز، بیزیم کندیمیز" ،"تورقای و گولای" پوئمالاری­نین، دئتئکتیو رومانلار کیمی سلسله نثر اثرلری­نین، گونوموزون نبضینی توتان اونلارلا مقاله‌نین مؤلفی­دیر. شوبهه‌سیز کی، وطنه شرفله خدمت ائدن صابر قلمی دؤورون آکتوال موضوعلارینی عکس ائتدیرمه‌یه اوغورلا داوام ائده‌جک­دیر.

  منبع: دنیزنیوز سایتی

 

 

 

 

 


93/6/24::: 11:32 ع
نظر()
  

 

آرازباری کتابی نین تقدیمات مراسمی اورمیادا کئچیریلدی

تانینمیش آذربایجانلی معاصر شاعره «سونا ولی­یوا»نین «آرازباری» آدلی شعر کتابی ایرانلی شاعر و یازیچی اکبر حمیدی علیارین واسطه سیله اسکی الفبایه کؤچورولوب، بو ایل ایراندا، قم شهرینده آوای منجی نشریاتی­نین تشبثی­ایله چاپ اولوب.

دنیزنیوز سایتی­نین وئردیگی خبره گؤره، بو کتابین تقدیمات مراسمی شهریور آیی­نین 5 ده اورمیه شهرینده حوزه هنری طرفیندن برپا ائدیلدی. بو مراسمده 50 یه یاخین شاعر و ادبی تنقیدچی اشتراک ائتمیش، نئچه نفر اؤز فکیرلرینی کتاب حاقدا سؤیله­دیلر. مراسمین باشلاغیجیندا، حوزه هنری­نین ادبیات شعبه­سی­نین مدیری مصطفی قلیزاده علیار، شاعره «سونا ولی­یوا»نین شعر و فکیرلرینی مترقی قیمتلندیریب، دئدی: سونا خانم ولی­یوا چاغداش دونیامیزین احوال روحیه سینی تانیمیش، بیر متفکر شاعر کیمی اؤز مترقی و انسانی فیکیرلرینی شعر دیلی و شاعر دویغوسو ایله بیان ائدیبدیر.

-« سونا ولی­یوانین شعر دونیاسی چوخ اینجه دویغولو و محبت­دن دولودور، اونون اؤز ملتینه، وطنینه و دوغما تورپاغینا سونسوز عشقی وار»، دئین م. قلیزاده علیار وورغولادی: «سونا ولی­یوا وطن تورپاغی­نین بؤیوک حصه­سی اوزون مدت ائرمنی اشغالیندا قالماسی، شاعره­نین اوره­ینی سیخیب، اؤز شعرلرینده ناله­یه گتیریر و اوخوجونو دا اؤزو ایله بیرگه آغلادیر.»

تانینمیش اورمیه­لی شاعر حمید واحدی ده بو مراسمده اؤز فکیرلرینی مجلس اهلی ایله بؤلوشدو. او سونا خانمین شعرلرینی فیکیر باخیمیندان دقته لایق بیلدی و دئدی: سونا خانمین شعرلری ساده دیلده اوسادا، فیکیر باخیمیندان چوخ ده­یرلی­دیر و یئنی دوشونجه وار.

او «کیمسه یوخدو آغی دئسین بو کنده» آدلی شعری درین اجتماعی بیر فکیر کیمی ده­یرلندیردی.

اوستاد محمود شامی ده، اکبر حمیدی علیارا آذربایجان شاعرلری­نین اثرلرینی کؤچوردویونونه گؤره اؤز تشکرونو بیلدیریب، دئدی: اکبر حمیدی علیار بو گون آذربایجان ادبیاتینا بویوک قایغی گؤستریر و اونلاردان بیری بو ده­یرلی و درین فیکیرلی «آرازباری» کتابی­دیر.

رویا شاه حسین زاده، علی شجاع، خلیل شیخلو، شاهرخ رضوانی، زهرا کریم­زادگان، علی رزم آرای، قنبر حاجیوند و اسماعیل مددی اؤز نقطعه یی نظرلرینی «آرازباری» کتابی حاقدا بیلدیردیلر.

تهراندان بو مراسمه تلفون واسطه­سیله قوشولان اکبر حمیدی علیار دا اؤز تشکرونو غربی آذربایجان ولایتی­نین حوزه هنری اداره­سینه و مراسم اشتراکچیلارینا بیلدیریب، سؤیله­دی: منجه سونا خانمین شعرلری بوگونون شعری­دیر و بو گونکی اجتماعی - انسانی حال- هوانی عکس ائتدیریر.

قید ائدک کی، اورمیه عاشیق مکتبی­نین گؤرکملی صنعتکاری عاشیق نباتعلی علیزاده ده بو مراسمده سونا خانمین ایکی شعرینی ساز ایله اوخودو.

 


93/6/6::: 2:2 ص
نظر()
  

واختی دیر

اکبر حمیدی علیار

ای کؤنول غفلتده یاتما دورکی قالخماق واختی­دیر

جان قوشون معنا سماسیندا بوراخماق واختی­دیر

بیر اووشدور گؤزلرین قوی ییرتیلا اؤرتوکلری

وارلیغا، دونیایه آیدین گؤزله باخماق واختی دیر

عیبی یوخدور اشتباهلار، سهولر تونقاللاشیب

توبه آدلی کیبریتی تونقالدا چاخماق واختی دیر

جان بویانمیش جوربه­جور سولغون، یاراشماز رنگلره

حاق بویاغین بو بویاقلار اوسته یاخماق واختی­دیر

دوم-دورو سو قالسا گر بیر یئرده بیرگون کیفله نیر

گل چالیش، آختار، ایز آچ دریایه آخماق واختی دیر

شوق ایله بیر سیلکه­لن، روحون دا قوی یونگوللشه

دارجا کؤهنه­لمیش قابیغدان ایندی چیخماق واختی­دیر

یول اینام، مرکب عمل، مین سورگونن قالما دالی

معرفت بایراغین ،اوغلان، عرشه تاخماق واختی دیر

ای «حمیدی» واخت کئچر گؤزله قاچیرما فرصتی

قاچ کی نور کروانی یوللاندی، قاریخماق واختی­دیر


93/4/28::: 6:24 ع
نظر()
  
   1   2   3   4   5   >>   >